Zwe Meter u füfzäh Minute
Mir haute physical distance u mir chöme sozial üs necher
Mir wäsche üsi Händ nid i Unschuld, trage Maske gäge d‘Viecher
Mir haute d’Luft a und d’Ärde atmet uf und wird stercher
Zwe Meter u füfzäh Minute, das isch ds’Mass, das isch d’Einheit
Zwe Meter u füfzäh Minute, das isch das, wo i d’Gschicht iigeit
Zwe Meter u füfzäh Minute – es Symbol wo üs so viel seit…
Mir si d’Chrone vor Schöpfig und itz köpft üs die Chrone
U d’Natur hout üs ihri Botschafte ständig um d‘Ohre
Mir füele üs aus Gwinner, aber mir hei längschtens verlore
Mir läbe i Angscht und si vo dere Angscht verfüert
Mir hei d’Ouge offe u gseh glich nid, was aus passiert
Mir wei d’Normalität, aber die het au das ersch initiiert
Zwe Meter u füfzäh Minute, das isch ds’Mass, das isch d’Einheit
Zwe Meter u füfzäh Minute, das isch das, wo i d’Gschicht iigeit
Zwe Meter u füfzäh Minute – es Symbol wo üs so viel seit…
Mir verteile Gäud, aber Gäud isch ja ds‘Problem
Mir flüge nümm, aber flüge isch doch so bequem
U mir gheie tief, dür d’Löcher vo üsem Syschtem
Mir rede gschiid, aber handle nid, oder nume blöd
Mir sueche d’Schuld und erkenne üsi eigeti nid
Mir sie grad itz vo üsem eigete Unglück dr‘Schmid
Zwe Meter u füfzäh Minute, das isch ds’Mass, das isch d’Einheit
Zwe Meter u füfzäh Minute, das isch das, wo i d’Gschicht iigeit
Zwe Meter u füfzäh Minute – es Symbol wo üs so viel seit…
Mir atme wieder uf – und d’Wäut um üs ume erschtickt
Mir reduziere dr’Abstand u rücke wäg vom ächte Konflikt
Mir desinfiziere üsi Händ – und üsi Uhr dran tickt
Vilech isch’s die letschti Chance, aber üsi Blindheit drückt düre
Dür d’Eiwäghändsche düre chöi mer gar nüt meh gschpüre
Mir luege üs i d‘Ouge – das üs das no cha glinge
So viu Opfer het’s gä, aber mir chöi kes erbringe
Mir hei kes schlächts aber mir hei so viu ufem Gwüsse
Mir hei Sehnsucht, aber d’Ärde, die wird üs nid vermisse
Mir blüie wider uf, aber üsi Zuekunft isch am verblasse
Zwe Meter u füfzäh Minute, das isch ds’Mass, das isch d’Einheit
Zwe Meter u füfzäh Minute, das isch das, wo i d’Gschicht iigeit
Zwe Meter u füfzäh Minute – es Symbol wo üs so viel seit…
Zwe Meter u füfzäh Minute, das isch ds’Mass, das isch d’Einheit
Zwe Meter u füfzäh Minute, das isch das, wo i d’Gschicht iigeit
Zwe Meter u füfzäh Minute – es Symbol wo üs so viel – hät gseit…
K(o)rönchen-Mai 2020; copyright: www.schreibstoff.ch